Kim Simonsen verður givin út í Kina
Tvær bøkur hjá Kim Simonsen á veg inn á kinesiska bókamarknaðin
Tvær bøkur hjá Kim Simonsen eru nú umfataðar av eini avtalu um kinesiska útgávu: Hvat hjálpir einum menniskja at vakna ein morgun hesumegin hetta áratúsundið frá 2013 og Lívfrøðiliga samansetingin í einum dropa av havvatni minnir um blóðið í mínum æðrum frá 2023.
Týðingarnar verða gjørdar beinleiðis úr føroyskum til kinesiskt og koma út í innbundnari útgávu í 2028.
Avtalan er eitt týðandi nýtt stig fyri føroyskan skaldskap. Við útgávunum fær føroyskt mál og skaldskapur atgongd til ein nýggjan og stóran lesaramarknað.
Sambandið varð styrkt í sambandi við vitjanina hjá Kim Simonsen í Shanghai í oktober. Har hevði hann upplestur á Minsheng Art Museum og síðani fund við kinesiska forlagið East China Normal University Press.
Hvat hjálpir einum menniskja at vakna ein morgun hesumegin hetta áratúsundið fekk M.A. Jacobsens virðisløn í 2014. Lívfrøðiliga samansetingin í einum dropa av havvatni minnir um blóðið í mínum æðrum varð í 2024 tilnevnd til Bókmentavirðisløn Norðurlandaráðsins. Saman við amerikanska týðaranum Randi Ward er Kim Simonsen eisini á stuttlistanum til 2026 ALTA First Translation Prize.
Avtalan er gjørd av Exile Agency, sum arbeiðir við at selja rættindi til forløg kring heimin.
Kim Simonsen er seinnu árini útgivin í USA, Estlandi, Makedonia, Danmark, Ungarn og Italia. Hann er eisini útgivin í týðandi tíðarritum og antologium, serliga í USA, eitt nú Washington Square Review, Best Literary Translations, Columbia Journal, Asymptote, Scandinavian Review, Notre Dame Review, The Ilanot Review og Trafika Europe.
Fyrr í ár hevur hann lisið á Venezia Literature Festival, Reykjavík Poetics, Ålesunds Litteraturfestival og á Prima Vista í Estlandi og lesur seinni í oktober á Stockholms Internationella Poesifestival.
Í hesum arbeiðinum hevur Randi Ward spælt ein stóran leiklut í altjóða arbeiðinum kring skaldskapin hjá Kim Simonsen. Hon hevur fingið fýra virðislønir sum týðari, bæði í USA og í Føroyum.
Við komandi kinesisku útgávunum verður Kina nú ein nýggjur og týðandi partur av hesum altjóða arbeiðinum.
Kim og Randi á amerikanskan úrvalslista
Kim Simonsen og Randi Ward á amerikanskan úrvalslista Yrkingasavnið Hvat hjálpir einum menniskja at vakna ein morgun hesumegin hetta áratúsind eftir Kim Simonsen er á úrvalslistanum til ALTA First Translation Prize 2026. Bókin kom út á enskum á amerikanska forlagnum...
Elin og Jonna tilnevndar ALMA
Barnaútvarpið av ídnaðstu lesistuðlum 17. oktober var endiliga alment, at Rithøvundafelagið hevur tilnevnt Elin á Rógvi og Jonnu Fritsdóttir Mortensen til ALMA virðislønina 2027 fyri teirra ótroyttiliga arbeiði við dygdargóðum útvarpi, har tær við sendingum av sera...
Góð verk hava brúk fyri tíð
“Góð verk hava brúk fyri tíð, kritikki og transformatión til at vaksa seg fram” Útbúgvingin Ritlist varð sett á stovn á Setrinum í 2019. Fyrstu studentarnir byrjaðu í sep. 2019. Higartil hava 9 tikið prógv í Ritlist. 11 hava tikið prógv í Tónlist. Tikið verður upp 3....