Heðin M. Klein heiðurslimur

Rithøvundafelag Føroya heiðraði í kvøld tveimum rithøvundum fyri drúgt og dygt arbeiði fyri føroyskum bókmentum. Annar teirra er Heðin M. Klein, sum fekk heiðursbræv við hesum orðum:

Heiðursbræv

Heðin M. Klein hevur við sínum málsliga nærlagni viðgjørt lívsins mangfoldigu løtur í sínum skaldskapi. Um tað er í hansara egnu yrkingum ella í týðingum, tað tað sama. Hann hevur flutt heimsbókmentir yvir í føroyskt mál. Bæði Nelly Sachs og Paul Celan eru nú á føroyskum, og norska skaldið Olav H. Hauge. Sum høvundur skarar Heðin framúr. Mest týðandi bókin, hann hevur ríkað okkum við, er yrkingasvitan, Tað orðið.

Heðin hevur í fleiri umførum sitið í nevndini í Rithøvundafelagi Føroya, har hann hevur starvast fyri at betra um korini hjá rithøvundum í Føroyum. Tað hevur hann gjørt við stórum innliti í politiskar leikir, og góðum og væl umhugsaðum grundgevingum.

Tí nevnir Rithøvundafelag Føroya í dag Heðin M. Klein til heiðuslim.